Shri Hit Chaurasi, pad 63

मोहन मदन त्रिभंगी।
मोहन मुनि मन रंगी।।
मोहन मुनि सघन प्रगट परमानँद गुन गंभीर गुपाला।
सीस किरीट श्रवण मनि कुंडल उर मंडित बन माला।।
पीतांबर तन धातु विचित्रित कल किंकिनि कटि चंगी।
नख मनि तरनि चरन सरसीरूह मोहन मदन त्रिभंगी।।
मोहन बैंनु बजावै।
इहिं रव नारि बुलावै।।
आईं ब्रज नारि सुनत बंसी रव गृह पति बंधु विसारे।
दरसन मदन गुपाल मनोहर मनसिज ताप निवारे।।
हरषित बदन बैंक अवलोकन सरस मधुर धुनि गाव।
मधुमय श्याम समान अधर धरे मोहन बैंनु बजावे।।
रास रचा बन माँही।
विमल कलप तरु छाँहीं।।
विमल कलपतरु तीर सुपेशल सरद रैंन वर चंदा।
सीतल मंद सुगंध पवन बहै तहाँ खेलत नंद नंदा।।
अदभुत ताल मृदंग मनोहर किंकिनि शब्द कराहीं।
जमुना पुलिन रसिक रस सागर रास रच्यो बन माँहि।।
देखत मधुकर केली।
मोहे खग मृग बेली।।
मोहे मृगधैंनु सहित सुर सुंदरि प्रेम मगन पट छूटे।
उडगन चकित थकित ससि मंडल कोटि मदन मन लूटे।।
अधर पान परिरंभन अति रस आनँद मगन सहेली।
(जै श्री) हित हरिवंश रसिक सचु पावत देखत मधुकर केली

mohan madan tribhangee.
mohan muni man rangee.
mohan muni saghan pragat paramaanand gun ganbheer gupaalaa.
sees kireet shravan mani kundal ur mandit ban maalaa.
peetaanbar tan dhaatu vichitrit kal kinkini kati changee.
nakh mani tarani charan saraseerooh mohan madan tribhangee.
mohan bainnu bajaavai.
ihin rav naari bulaavai.
aaeen braj naari sunat bansee rav grih pati bandhu visaare.
darasan madan gupaal manohar manasij taap nivaare.
harashit badan baink avalokan saras madhur dhuni gaava.
madhumay shyaam samaan adhar dhare mohan bainnu bajaave.
raas rachaa ban maanhee.
vimal kalap taru chhaanheen.
vimal kalapataru teer supeshal sarad rainn var chandaa.
seetal mand sugandh pavan bahai tahaan khelat nand nandaa.
adabhut taal mridang manohar kinkini shabd karaaheen.
jamunaa pulin rasik ras saagar raas rachyo ban maanhi.
dekhat madhukar kelee.
mohe khag mrig belee.
mohe mrigadhainnu sahit sur sundari prem magan pat chhoote.
udagan chakit thakit sasi mandal koti madan man loote.
adhar paan pariranbhan ati ras aanand magan sahelee.
(jai shree) hit harivansh rasik sachu paavat dekhat madhukar kelee