Shri Hit Chaurasi, pad 57

प्रथम जथामति प्रनऊँ (श्री) वृंदावन अति रम्य।
श्रीराधिका कृपा बिनु सबके मननि अगम्य।।
वर जमुना जल सींचन दिनहीं सरद बसंत।
विविध भाँति सुमनसि के सौरभ अलिकुल मंत।।
अरुन नूत पल्लव पर कूँजत कोकिल कीर।
निर्तनि करत सिखी कुल अति आनंद अधीर॥
बहत पवन रुचि दायक सीतल मंद सुगंध।
अरुन नील सित मुकुलित जहँ तहँ पूषन बंध ।
अति कमनीय विराजत मंदिर नवल निकुंज।
सेवत सगन प्रीतिजुत दिन मीनध्वज पुंज।।
रसिक रासि जहँ खेलत स्यामा स्याम किसोर।
उभे बाहु परिरंजित उठे उनींदे भोर।।
कनक कपिस पट सोभित सुभग साँवरे अंग।
नील वसन कामिनि उर कंचुकि कसुँभी सुरंग।॥।
ताल रबाब मुरज उफ बाजत मधुर मृदंग।
सरस उकति गति सूचत वर बँसुरी मुख चंग।।
दोउ मिलि चाँचरि गावत गौरी राग अलापि।
मानस मृग बल वेधत भृकुटि धनुष दृग चापि।।
दोऊ कर तारिनु पटकत लटकत इत उत जात।
हो हो होरी बोलत अति आनंद कुलकात।।
रसिक लाल पर मेलति कामिनि बंधन धूरि।
पिय पिचकारिनु छिरकत तकि तकि कुंकुम पूरि।।
कबहुँ कबहुँ चंदन तरु निर्मित तरल हिंडोल।
चढ़ि दोऊ जन झूलत फूलत करत किलो।।
वर हिंडोर झँकोरनी कामिनि अधिक डरात।
पुलकि पुलकि वेपथ अँग प्रीतम उर लपटात।।
हित चिंतक निजु चेरिनु उर आनँद न समात।
निरखि निपट नैंननि सुख तृन तोरतिं वलि जात।।
अति उदार विवि सुंदर सुरत सूर सुकुमार।
(जै श्री) हित हरिवंश करौ दिन दोऊ अचल विहार

pratham jathaamati pranaoon (shree) vrindaavan ati ramya.
shreeraadhikaa kripaa binu sabake manani agamya.
var jamunaa jal seenchan dinaheen sarad basanta.
vividh bhaanti sumanasi ke saurabh alikul manta.
arun noot pallav par koonjat kokil keera.
nirtani karat sikhee kul ati aanand adheera.
bahat pavan ruchi daayak seetal mand sugandha.
arun neel sit mukulit jahan tahan pooshan bandh .
ati kamaneey viraajat mandir naval nikunja.
sevat sagan preetijut din meenadhvaj punja.
rasik raasi jahan khelat syaamaa syaam kisora.
ubhe baahu pariranjit uthe uneende bhora.
kanak kapis pat sobhit subhag saanvare anga.
neel vasan kaamini ur kanchuki kasunbhee suranga.
taal rabaab muraj uph baajat madhur mridanga.
saras ukati gati soochat var bansuree mukh changa.
dou mili chaanchari gaavat gauree raag alaapi.
maanas mrig bal vedhat bhrikuti dhanush drig chaapi.
dooo kar taarinu patakat latakat it ut jaata.
ho ho horee bolat ati aanand kulakaata.
rasik laal par melati kaamini bandhan dhoori.
piy pichakaarinu chhirakat taki taki kunkum poori.
kabahun kabahun chandan taru nirmit taral hindola.
charhi dooo jan jhoolat phoolat karat kilo.
var hindor jhankoranee kaamini adhik daraata.
pulaki pulaki vepath ang preetam ur lapataata.
hit chintak niju cherinu ur aanand n samaata.
nirakhi nipat nainnani sukh trin toratin vali jaata.
ati udaar vivi sundar surat soor sukumaara.
(jai shree) hit harivansh karau din dooo achal vihaar