Shri Hit Chaurasi, pad 30

देखत नव निकुंज सुनु सजनी लागत है अति चारु ।
माधविका केतकी लता ले रच्यौ मदन आंगारु ।।
सरद मास राका निसि सजनी सीतल मंद सुगंध समीर।
परिमल लुब्ध मधुव्रत विथकित नदित कोकिला कीर।।
वहु विध रङ्ग मृदुल किसलय दल निर्मित पिय सखि सेज ।
भाजन कनक विविध मधु पूरित धरे धरनी पर हेज ।।
तापर कुसल किसोर किसोरी करत हास परिहास ।
प्रीतम पानि उरज वर परसत प्रिया दुरावति वास ।।
कामिनि कुटिल भृकुटि अवलोकत दिन प्रतिपद प्रतिकूल ।
आतुर अति अनुराग विवस हरि धाइ धरत भुज मूल ।।
नगर नीवी बन्धन मोचत एंचत नील निचोल ।
बधू कपट हठ कोपि कहत कल नेति नेति मधु बोल ।।
परिरंभन विपरित रति वितरत सरस सुरत निजु केलि ।
इंद्रनील मनिनय तरु मानौं लसन कनक की बेली ।।
रति रन मिथुन ललाट पटल पर श्रम जल सीकर संग ।
ललितादिक अंचल झकझोरति मन अनुराग अभंग ।।
(जै श्री) हित हरिवंश जथामति बरनत कृष्ण रसामृत सार ।
श्रवन सुनत प्रापक रति राधा पद अंबुज सुकुमार

dekhat nav nikunj sunu sajanee laagat hai ati chaaru .
maadhavikaa ketakee lataa le rachyau madan aangaaru .
sarad maas raakaa nisi sajanee seetal mand sugandh sameera.
parimal lubdh madhuvrat vithakit nadit kokilaa keera.
vahu vidh rang mridul kisalay dal nirmit piy sakhi sej .
bhaajan kanak vividh madhu poorit dhare dharanee par hej .
taapar kusal kisor kisoree karat haas parihaas .
preetam paani uraj var parasat priyaa duraavati vaas .
kaamini kutil bhrikuti avalokat din pratipad pratikool .
aatur ati anuraag vivas hari dhaai dharat bhuj mool .
nagar neevee bandhan mochat enchat neel nichol .
badhoo kapat hath kopi kahat kal neti neti madhu bol .
pariranbhan viparit rati vitarat saras surat niju keli .
indraneel maninay taru maanaun lasan kanak kee belee .
rati ran mithun lalaat patal par shram jal seekar sang .
lalitaadik anchal jhakajhorati man anuraag abhang .
(jai shree) hit harivansh jathaamati baranat krishn rasaamrit saar .
shravan sunat praapak rati raadhaa pad anbuj sukumaar